ஆகட்டும்டா தம்பி ராஜா / எப்படி?எதற்கு?ஏன்?

வழக்கம்போலவே ஆடி அசைந்துகொண்டு பத்து மணிக்கு மேல்தான் அலுவலகத்துக்கு வந்து சேர்ந்தார்கள் பணிபுரிபவர்கள் அனைவருமே!

பலமுறை கோபப்பட்டுக் கண்டித்தும் பலனில்லாத்தை நினைத்து வருந்தினார் மேனேஜர். ரொம்ப நேரம் யோசித்து ஒரு காரியம் செய்தார்.

அதன்படி அன்று மாலையே கூட்டம் ஒன்றினை ஏற்பாடு செய்தார். அலுவலக நேரத்தில்தான் கூட்டம் நடைபெற்றது என்பதால் அத்தனை பணியாளர்களும் தவறாமல் ஆஜராகி இருந்தனர்.

பேச அழைக்கப்பட்டிருந்த சொற்பொழிவாளர் எடுத்த எடுப்பில் ஒரு கேள்வியை எடுத்து வீசினார்.. “ஒரு நாளைக்கு பத்து கிலோமீட்டர் தூரம் நடந்து செல்ல முடியும் என வைத்துக் கொள்ளுங்கள். நூறு கிலோ மீட்டர் தொலைவில் சொர்க்கம் இருப்பதாகவும் கற்பனை பண்ணிக் கொள்வோம். உங்களால் எத்தனை நாட்களில் சொர்க்கத்தை அடைய முடியும்?” என்றார்.

ஒன்றாம் வகுப்பு பொடியனிடம் கேட்க வேண்டிய கேள்வியை இங்கு வந்து கேட்கிறாரே என கேலிச்சிரிப்பைக் காட்டியது கூட்டம்!

“உங்கள் அனைவரது சார்பில் யாராவது ஒருவர் மேடைக்கு வந்து என் கேள்விக்கு பதில் சொல்லவும்” என்றார் சொற்பொழிவாளர்.

பலர் எழுந்தனர். ஒருவர் மேடையேறினார். “பத்து நாட்களில் சொர்க்கத்தை அடைந்து விடுவோம். சிறு பிள்ளைத்தனமான கேள்வி இது!” என்றார் கிண்டலாக.

“இல்லை. நீங்கள் சொன்னது தவறு. இருபது நாட்களாவது ஆகும்!” என்றார் சொற்பொழிவாளர். தொடர்ந்து அவர் சொன்ன விளக்கத்தான் அது உண்மை எனப் புரிந்துகொண்டு தலை கவிழ்ந்தனர் பணியாளர்கள் அனைவருமே.

அப்படி என்ன விளக்கம் சொன்னார் அவர்?!


?

?

?

?

?

?

?

“ஒரு நாளைக்கு பத்து கிலோமீட்டர் என கணக்கெடுத்துக் கொண்டால் பத்து நாட்களில் சொர்க்கத்தை அடைந்துவிடலாம் என்பது சரிதான். ஆனால் வாரத்தில் சனி, ஞாயிறு இரண்டு நாட்களும் உங்களுக்கு விடுமுறை. அதைக் கழித்துவிட்டால் பன்னிரெண்டு நாட்களாகும் நீங்கள் நடக்க. அப்புறம் ஒவ்வொரு வாரமும் தவறாமல் நீங்கள் அலுவலகத்துக்கு விடுமுறை போடுவதையும், வழக்கமாக அலுவலகத்துக்கு தாமதமாக வருவதையும் கணக்கெடுத்துக் கொள்ளவேண்டும். அதே தாமதத்தோடுதான் எழுந்து நடக்க ஆரம்பிப்பீர்கள். எல்லோரும் பத்து நாளில் அடையும் சொர்க்கத்தை கண்டிப்பாக நீங்கள் அடைய இருபது நாட்களாவது ஆகிவிடும்!”

முந்தைய 'எப்படி? எதற்கு? ஏன்?'கள் இங்கே!